Հայտնի 2 դոլարանոցի պատմությունը

Շատերս լսել ենք, ոմանք՝ նույնիսկ ունեն այս թղթադրամից: 2 դոլարանոց՝ հազվադեպ հանդիպող և հետաքրքիր պատմություն ունեցող ամերիկյան թղթադրամ:
2 դոլարանոց թղթադրամը առաջին անգամ թողարկվել է 1775 թ.-ին: Այդպիսի թղթադրամներ այն ժամանակ թողարկում էին նաև առանձին նահանգներ. Մերիլենդը՝ 1770 թ.-ից, Նյու Յորքն ու Հյուսիսային Կարոլինան՝ 1775 թ.-ից, Ջորջիայում ու Նյու Հեմփշիրում՝ 1776-ից: Առաջին քաղաքացիական պատերազմի տարիներին՝ 1861-65 թթ-ին, շատ նահանգներ սկսեցին իրենց թղթադրամները տպել՝ այդ թվում և 2 դոլարանոց:

1862 թ-ի թողարկում

Տարբեր ժամանակներում 2 դոլարանոց թղթադրամները տարբեր տեսք են ունեցել: Եվ միայն 1869թ-ին՝ լուրջ փոփոխությունների ենթարկվելուց հետո վրան հայտնվեց ԱՄՆ երրորդ նախագահ և «Անկախության հռչակագրի» հեղինակ Թոմաս Ջեֆֆերսոնի պատկերը: Իսկ արդեն 1928 թ.-ի տարբերակի մի երեսին պատկերված էր Ջեֆֆերսոնը, իսկ հակառակ կողմում նրա կալվածքը՝ Մոնտիչելլոն:

1928 թ-ի թողարկում

Սակայն հենց թողարկման պահից, այս թղթադրամին չհաջողվեց հետաքրքրություն առաջացնել ո՛չ բնակչության, ո՛չ բանկերի մոտ:

Նոր թղթադրամից դժգոհությունները մի քանիսն էին: Ամենատարածված պատճառներից մեկն այն էր, որ 2 դոլարանոցի համար դրամարկղի մեջ առանձին տեղ հատկացված չէր: Այստեղից էլ ծնվում էր երկրորդ դժգոհության պատճառը.երբեմն 2 դոլարանոցները շփոթում էին մեկ դոլարանոցի հետ և ավել մանր տալիս: Բացի դրանից, ժողովրդի մեջ տարածվել էր սնահավատություն, որ 2 դոլարանոցը անհաջողություն է բերում: Դա գալիս էր դեռևս խաղամոլներից, ովքեր 2-նոց խաղաքարտը անհաջող էին համարում, քանի որ դա ամենացածրն էր:

Այս ամենը նպաստեց նրան, որ նույնիսկ առևտրականները սկսեցին 2 դոլարանոց թղթադրամները խանութներում չընդունել:

Այդպիսով, 1966 թ.-ին թողարկվեց վերջին տպաքանակը, իսկ նույն թվականի օգոստոսի 10-ին 2 դոլարանոցի թողարկումը կասեցվեց:

Եվ միայն 1976 թ.-ին՝ «Անկախության հռչակագրի» ստորագրման 200-ամյակի կապակցությամբ, թողարկվեց հոբելյանական 2 դոլարանոց թղթադրամ, որի հակառակ կողմում պատկերված էր ԱՄՆ «Անկախության հռչակագրի» ստորագրման պահը հավերժացնող կտավը:

1976 թ.-ի թողարկում

Կտավը պատկանում է հայտնի ամերիկացի նկարիչ Ջ. Տրամբուլլային և կոչվում է «Անկախության հռչակագրի ստորագրումը»: Նրանում պատկերված է 1776 թ.-ի հուլիսի 4-ի Երկրորդ Մայրցամաքային կոնգրեսի նիստը, որը և հայտարարեց Մեծ Բրիտանիայից 13 հյուսիսամերիկյան նահանգների անկախության մասին: Նկարում հստակ պատկերված է այն պահը, երբ Ջեֆֆերսոնը՝ անկախության հռչակագրի նախապատրաստման հանձնախմբի ևս 4 անդամների հետ, հռչակագրի նախագիծը փոխանցում է Մայրցամաքային կոնգրեսի նախագահ Հենկոկին՝ ստորագրման համար (աջից՝ բազկաթոռի մեջ նստած): Նկարում պատկերված էին 47 մարդ, բայց թղթադրամի վրա տեղավորվեց միայն 44-ը:

Ջոն Տրամբուլլայի «Անկախության հռչակագրի ստորագրումը» կտավը, 1817-19թթ

Մասնակիցների ցուցակը

1976 թ.-ի հոբելյանական 2 դոլարանոցը թողարկվեց միլիոնավոր օրինակներով, բայցևայնպես, ամենաշրջանառվող թղաթդրամը համարվում է 1 դոլարանոցը: Այն զբաղեցնում է ընդհանուր շրջանառվող ԱՄՆ թղթադրամների 47%-ը: 

Նայելով Պիկի «Աշխարհի թղթադրամները» կատալոգը, կհամոզվեք, որ 1963 թ.-ի թողարկմամբ (հետևի կողմում Մոնչիտելլոն), ամբողջովին նոր 2 դոլարանոցն արժե 4.5 դոլար, իսկ 1976 թ.-ի թողարկմանը՝ 4 դոլար: Իսկ ամբողջովին նոր 1 դոլարանոցը՝ 2 դոլար: Այսօր ևս 2 դոլարանոց թղթադրամներ թողարկվում են և գտնվում են շրջանառության մեջ: Հազվագյուտ են 1976 թ.-ին թողարկվածները:

Հետաքրքիր մի փաստ ևս՝ կապված կտավի, իսկ այնուհետև թղթադրամի վրա պատկերված «գլխարկով մարդու» հետ: Հասարակությունը տարբեր լեգենդներ է հյուսում այդ անձի շուրջ, բայց նա, ոչ այլ ոք, քան Ստիվեն Հոպկինսն է՝ ամերիկյան քաղաքական գործիչ, Ռոդ Աիլենդ գաղութի նահանգապետը, ԱՄՆ անկախության առաջամարտիկներից: Բայց թե ինչու՞ է նա գլխարկով՝ պատմությունը լռում է այդ մասին: